2010erako aurrekontuarekin konparatuz, 641.789 euro gutxiagoakoa onartu du Udalak heldu den urterako: 2.954.789 eurokoa, hain zuzen. Ezker abertzaleko eta EAren aldeko botoekin atera da aurrekontua aurrera.
Baina horrekin batera, azken bi urte hauetan egin bezala, zergak eta tasak izoztea erabaki du Udalak, eta krisia izan da horren arrazoia: «Krisialdi haundian gaude eta Udala horretaz jabetzen delako hartu du erabakia, beti ere, zerbitzuetan ahalik eta eragin ttikiena izan dezan kalkulatuz». Halaxe azaldu dio Xabier Zabalo alkateak TTIPI-TTAPAri.
Inbertsio nagusiak
2011ra begira eginen den inbertsio nagusiena hilerra haunditzea eta horma-hilobi/kolunbario berriak egitea izanen da. 290.000 euroko diru-saila aurreikusi da horretarako. Horrekin batera, Otemotz errekatik ura ekartzeko 150.000 euro onartu dira; Erleta eskolan igogailua jartzeko 160.000 euro eta Haur Eskolan sukaldea jartzeko 30.000 euro.
2012an egitekoak diren Amazabaleko berrurbanizazioa eta ura tratatzeko estaziorako proiektuak erredaktatzeko 54.000 euroko partida hitzartu da.
Bestalde, Zabalok jakinarazi duenez, «Udalaren zor bizia 800.000 eurotan jaitsi da azken lau urteetan».
2010eko egitasmoak
2010ean Ibero ingurua erostea zen aurreikusitako inbertsio nagusiena, baina alkateak argitu duenez, «Nafarroako Gobernuak dirulaguntza noiz emanen digun zain gaude». Antza, «dena adostua dago eta edozein momentutan eginen da». Gobernuak Ibero interes publikoko erosketa dela aldarrikatua du, eta beraz, diruz lagunduko du, baina oraindik ez da finkatu noiz izanen den hori.