Balorazio «oso baikorra» eginez joan da ALKE Kultur Taldea, Mendibil Mendi Taldea eta mikologiazaleek elkarlanean antolatutako Hirugarren Mikologialdia. Urriaren 21etik 23ra, ostegunetik larunbatera, jende asko ibili zen mendira joan eta perretxikoak biltzen. Eta larunbat arratsaldean bildutakoak sailkatu ondotik, igandearekin, urriak 24, erakusketa prestatu zuten udaletxeko karrapean: guztira 120 mota bereizi zituzten. Erleta eskolako neska-mutikoek mikologiarekin lotuta egindako marrazkiak ere ikusgai izan ziren. Baina ikusi bakarrik ez, dastatzeko aukera ere izan zen plaza inguruan. Ziza, barengorri, esnegorri eta onddoen 300 pintxo banatu baitziren. Horrez gain, herritarrek egindako eta gaiarekin lotutako argazkiak herriko saltokietako erakusleihoetan ikusgai egon ziren. Mikologialdiaren harira, merkatari batzuk dendak apaintzera ere animatu ziren. Beraz, jendearen erantzuna ikusita, antolatzaileak pozik: «parte-hartzea haundia izan da».
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun