Urte asko izan dira oso haur gutxirekin mugitu dela Goizuetatik Aranora txikitxoen bila etortzen den garraioa. Baina badirudi azkeneko urte hauetan gorantz egin duela herriko umetxoen kopuruak eta pixkanaka txandan-txanda eskolara mugitzeko garaia heltzen ari zaiela. 2009ko irailean bi berri hasi ziren eta aurtengoan beste bi: Haizea eta Leire. Guztira hamar haur joaten dira 3 eta 8 urte artekoak.
Pasa den urtean, Nafarroako Gobernuaren kudeaketa txar baten ondorioz, bi ibilgailutan banatuak joan ziren umeak, hiru alde batetik eta bost bestetik. Aurtengoan, ordea, elkarrekin joaten dira autobus berrian eta begiralea ere badute. Aipatzekoa da hamar hauek ez direla herriko haur guztiak, beste batzuk oraindik txikiegiak dira eskolaratzeko eta badira Hernani eta Donostiako ikastetxetara joaten direnak ere.