«Gizarte zibila osatzen duten familiarteko, lagun eta hainbat erakunde eta entitatek beren hildakoei lokal publikoetan agurra edo omenaldia egiteko baimena» ematen duen ordenantza onartu du Udalak. Alegia, hileta zibiliak baimentzeko eta egiteko araudia onetsi du. Herritarren askatasun ideologikoa, erlijiosoa eta gurtzari dagokiona bermatu nahi da horrela.
Leitzan erroldatutako herritarrek eta lehen mailako odolkidetasunerainoko haien senideek izanen dute hileta zibilerako aukera, aurretik beharrezkoa den dokumentazioa aurkeztuta.
Alkateak edo honen ordezko zinegotzi edo funtzionarioak finkatuko ditu hileta zibilerako eguna eta ordua, baita zein egoitza erabili ere. Aparteko egoerarik ezean, udaletxeko osoko bilkurako aretoa erabiliko da.
Astelehenetik igandera eginen dira hileta zibilak, 09:00etatik 14:00etara edo 17:00etatik 21:00etara. Zerbitzua erabiltzeagatik, Udalean erroldatuak daudenek 50 euro ordaindu beharko dituzte, eta ez daudenek 100 euro.