Telefono bidez herritarrei arreta eta laguntza eskaintzen duen zerbitzu berria abiarazi du Udalak: 012 zerbitzua. Apirilaren 30etik dago indarrean, eta zenbaki horretara deitzea nahikoa da, hainbat tramitazio eta kontsulta egiteko.
Besteak beste, udal informazioa eskura daiteke, tartean, Goizuetako kultur eta kirol agenda. Horrekin batera, errolda eta katastroko ziurtagiriak eskatzeko bidea ere badago, baita Udalak antolatzen dituen ikastaroetan izena emateko aukera ere. Erroldako datuak kontsultatu, ziurtagiriak eskatu, datu pertsonalak aldatu, zerga eta tasak ordaindu... Horiek eta beste hainbat egiten ahal dira 012ra deituta. Norbaitek kexak aurkeztu edo iradokizunak egin nahiko balitu, gauza bera egin beharko luke.
Teletramitazioa online
Bizpahiru hilabete barru, teletramitazioa online jarriko du Udalak. Eta horretarako Espainiako Gobernuaren Enplegu Planarekin hartuko den dirulaguntza erabiliko da. Zerbitzu berri honekin, nortasun agiri elektronikoa erabilita, orain arte udaletxean egiten ziren hainbat tramitazio Internetez egiten ahal izanen dira: zerga eta tasen ordainketa, ordainketa helbideratua, adminstrazioaren espediente guztiak kontsultatu, artxiboa jaso, instantziak eta bestelako orriak deskargatu, kexak eta iradokizunak egin... Udalak espediente guztiak digitalizatuko dituela ere aurreratu digu Mieljoxe Lekuona alkateak.
Bestalde, artxiboa digitalizatzeko lanari ere ekin dio Udalak. Liburu historikoak –XVI. eta XVII. mendekoak batzuk–, euskarri digitalean jartzea da helburua, 15.000 orri zehazki, eta lan hori egiteko ardura El Corte Ingles enpresari esleitu dio Udalak, 18.000 eurotan.