Goizuetako fiesten artean, aski estimatuak diren Txino auzoko jaiak ospatuko dira asteburu honetan Gazte Asanbladak antolatuta, Umore Ona Elkartea, Udala eta Gordea eta Zubi-Ondo tabernen laguntzarekin.
Ostiralean, apirilak 30, 20:00etan Zubi Ondo tabernan bertso saioa izanen da Beñat eta Unai Gaztelumendu anaiekin. 22:30ean, berriz, mus txapelketa izanen da eta ohi bezala, sari ederrak izanen dira: txapeldunek bi lagunentzako afaria irabaziko dute; bigarrenek arkumea; hirugarrenek langostinoak eta txakolina eta laugarrenek txuleta eta ardoa.
Fiesta giroa ostiraletik nabarituko bada ere, hasiera ofiziala larunbatean 11:00etan botako den itxaferoarekin emanen zaio. Aurretik, 10:00etan haurrentzako jokoak ere izanen dira. Txupinazoaren ondotik buru-haundiak kalean ibiliko dira trikitilariekin.
11:30ean aizkora eta harri-jasotze apustuak izanen dira eta 13:00etan Umore Ona Dantza Taldeko gaztetxoen emanaldia. Herri bazkariaren txanda etorriko da segidan. Aipatu, bazkarirako txartelak Amaia kafetegian daudela salgai.
18:00etatik aurrera Laket taldearekin berbena izanen da, eta 20:00etan Maskarrada dantza taldearen saioa. 23:00etan hasiko diren kontzertuekin (Itziarren semeak eta Skasti) emanen zaio bukaera aurtengo jaiei.