Leitza, Areso eta Goizuetako haur, guraso eta eskolek urteroko festa antolatu dute larunbaterako. Hitzordua Goizuetan izanen da eta antolatzaileek jende ugari inguratzea espero dute hamaikagarren edizio honetan.
Festa eguna 11:30ean hasiko da haurrentzako antolatuko diren tailer eta jolasekin eta ondotik, 13:30ak aldera, bi herrietako gonbidatuek, hau da, Leitzako eta Aresoko dan-tzari txikiek, kalejira eginen dute Goizuetako plazan.
Hori bukatuta, parte hartzaile guztientzako herri bazkaria eskainiko dute Goizuetako eskolan eta otorduaren ondoren, eskoletako umeen ekitaldiak prestatuko dituzte Udaletxeko ganbaran.
17:00etatik 17:45era berriz, txokolatea banatuko dute bertaratzen direnen artean eta festa egun haundia bukatzeko, 18:30ak arte, trikitilariak ibiliko dira kalez kale giroa jartzen.