Klase honetako gauzak bero-bero egitea hobe dela pentsatuta, iñoteei buruzko orainaz eta geroaz hitz egin asmoz, martxoaren 6rako bilerara deitu zituen herritarrak Mozorroen Taldeak. Adin guztietako karnabalzaleek erantzun zioten aipatu deialdiari, baita eztabaida aberats eta sakon baten barrenean hamaika ideia eta proposamen mahaigaineratu ere. Iñoteetako egun nagusiaz, astearteaz, alegia, hitz egin zen gehienbat. Mozorroen protagonismoaz gain, egunean zehar herritarren parte-hartzea haundiagoa izatea nahi da, eguerdi partean batez ere. Ilunabarreko zagi-dantzaren eta karrozen irteeraren uztarketari buruz ere luze eta zabal hitz egin zen.
Zuriñek, Mozorroen Taldeko idazkariak, orriak eta orriak bete zituen jendeak esandakoarekin. Ondorengo asteetan komisioak eztabaidatuko omen du guztia, eta Pazko ondoren beste bilera baterako deialdia luzatuko dute Mozorroek.