2010 arrazoi ditugulako martxan jarraitzeko eta urratsak emanez hartu martxa feminismorantz lemapean hainbat ekitaldi prestatu ditu Leitzaldeko Bilgune Feministak datozen egunetarako.
Ostiral honetan, hilak 5, Euskal Herriko Emakumeen Eskubideen Kartaren banatuko da azokan eta Amazabal Institutuan. Eskutitz honek herritartasun kontzeptua berdefinitzea du helburu, kontzeptu horretatik kanpo gelditu izan delako emakumea.
Larunbatean, martxoak 6, emakumea eta lana, prekarietateari aurre eginez! izanen da hizpide. Hala, Gona Gorontza bideoa ikusgai izanen da arratsaldean Leitzako tabernetan. 20:00etan Aurrera elkartean bideoa eta kafe tertulia izanen dira.
Martxoaren 8an, Emakume Langilearen Nazioarteko Egunean kontzentrazioa eginen da 20:00etan Lopeneko biribilgunean. Amazabal Institutuan, berriz, 10:15ean bideo emanaldia izanen da, eta ondoren, kontzentrazioa.
Martxoaren 12an, azkenik, Euskal Herriko Martxa eskualdera ailegatuko da.18:30ean txokolatada izanen da plazan eta egun guztian eskualdeko aldarriak bilduko dituen murala pintatzen ariko dira plazan. Arratsaldean herriko haur eta gaztetxoek ere murala margotzeko aukera izanen dute.
20:30ean, Mundu Martxa Leitzara ailegatzen denean, harrera plazan eginen zaio dantzari, Jeiki Abesbatza eta bertsolariekin. Testigantza liburua osatuko da herriko emakumeen aldarrikapenekin.
Segidan, Atekabeltzan afaria izanen da. Sarrerak Torrean eta Gaztañagan egonen dira salgai 10 euroren truke, hilaren 10a bitarte. Gauean kontzertua izanen da Komo tu taldearekin. Sorpresak ere iragarri dituzte antolatzaileek.