Otsailaren 13ko komunalari buruzko herri batzarra arrakastatsua suertatu zen, dudarik gabe. Nafarroako Gobernuarekin aurretik adostutako proposamenaren berri eman zien alkateak udaletxean bildutako 50 herritarrei. Hauek orokorrean ontzat jo zuten gainera, han entzundakoa.
Orain, eta beste pauso bat emanez, adostasun horren berri eman behar diote komunalaren erabiltzaileek Udalari. Horretarako nahikoa da Herriko Etxera joatea edo oraindik errazago, telefonoaz deitzea. Informazioa ere bertan emanen zaie interesatuei. Hil honen bukaera aldera, eta proposamenak espero den atxikimendua jasotzen badu, akordioa sinatuko dute Udalak eta Nafarroako Gobernuak.