Guttik espero zuten aizkolariak jantzi du III. Mailako Euskal Herriko Aizkolari Txapelketa: Arkaitz Olanok. Azaroaren 22an Goizuetan jokatu zen finala, eta txapelketan aritu diren 33 aizkolarietatik sei onenek jokatu zuten: Arkaitz Olano (Leitza), Oihan Larretxea (Bera), Ugaitz Mugertza (Mutriku, Gipuzkoa), Josu Aizpuru (Nuarbe, Azpeitia, Gipuzkoa), Raul Kastro (Urrotz) eta Juanjoxe Erdozia (Etxarri-Aranatz, Nafarroa).
Lehia estua eskaini zuten, eta batez ere, lehen lau sailkatuek. Gainera, azken momentura arte kolokan egon zen txapela, baita bigarren eta hirugarren postuak ere. Baina azken kanaerdikora leitzarra igo zen lehenbiziko eta berak ebaki zuen azkarren. Bigarren posturako lehia ere, ikusgarria izan zen, pare bat kolpeko aldeaz nagusitu baitzitzaion Larretxea Mugertzari.
SAILKAPENA
Arkaitz OLANO 14:23
Oihan LARRETXEA 14:59
Ugaitz MUGERTZA 15:03
Josu AIZPURU 15:38
Raul KASTRO 16:13
Juanjoxe ERDOZIA 18:23