Herriguneko trafiko arazoak saihesteko, eta bide batez, ibilgailu haundiei bidea errazteko, Elbarren kaleko biribilgunea haundiago batekin ordezkatzea erabaki du Udalak. Lanak duela aste batzuk hasi ziren, eta urte bukaerarako eginak egonen dira. 206.000 euroko aurrekontua dute eta Udalak eta Nafarroako Gobernuak ordainduko dute.
Biribilgune berriarekin orain arte hor egon den arkua tokiz aldatu behar izan da. Eta horrek eztabaida sortu du.
Hainbat aukera ibili zituen Udal Gobernu Taldeak esku artean arkuarekin zer egin jakiteko. Hala nola, udaletxe atzeko baratzetako batera eramatea proposatu zuen, eta han parke bat egitea. Baina aukera honek «luze» joko lukeelakoan, azkenean, Iñaki Perurenaren museora eramatea erabaki da, Perurenak berak hala proposatuta. Horrela baieztatu digu Xabier Zabalo alkateak. Eta trukean zera eskaini du Perurenak: hurrengo bi urtetan, hilabetean bi asteburutan museoa zabaltzean, herritarrek sarrera dohainik izanen dute.
Kokaleku berriarekin eztabaidak
Erabakia, baina, ez da denen gustukoa. EAk, ohar bidez, Lopeneako arkua berriz herri sarrerako biribilgunean jartzeko eskatu dio Gobernu Taldeari eta bertan ez jartzeko alkatearen erabakia politikoa dela uste du, «ez baitio inolako irizpide teknikori erantzuten».
Arkua biribilgunetik zaldiak bazkatzeko erabiltzen den udaletxearen atzealdeko baratzera eraman eta parkea egiteko proposamenari buruz zera adierazi du EAk. «begi onez ikusten dugu parkea, baina abstenitu egin ginen, nahiz eta ANVk gehiengo osoa izan eta erabakia bere esku izanen zuela jakin».
Parkea egiteari dagokionez, «urte bukaera baino lehen proposamen finkoa eta arkuaren kokapenarekin zerikusirik ez duena aurkezten bada» EAk «zalantzarik gabe» babestuko duela adierazi du.