Hemezortzi urterekin Ameriketara artzain joan eta 46rekin publizidade izar bihurtzea ipuinetan edo Estatu Batuetan bakarrik gertatu liteke. Horixe da Dionisio Txoperena gaur egun, izar bat, AT&T telefono konpainia egiten ari den publizidade kanpaina erraldoiaren protagonista baita gure herriko mutil hau.
Estatu Batuak, Kanada eta Mexikoko telebista kate, egunkari eta aldizkari garrantzitsuenetan agertzen da Dionisio, baita hiri guzietako publizitate paneletan ere. Bere anaia Jabier Marik ere parte hartu du kanpaina honetako iragarki batzuetan.
Txoperenak esan zigunez, suerteari zor dio gaur egun bizitzen ari den egoera hau, taberna batean zegoela hurbildu omen zitzaizkion publizistak froga batzuk egiteko proposamenarekin. Ordurako, ehundaka omen ziren probatuak, baina azkenean goizuetarra hautatu zuten. Bi urteko kontratua sinatu zuen eta oraindik erdia falta zaio betetzeko; hurrengo hilabeteetan beste hainbat iragarki grabatuko ditu Hollywooden, eta AT&T konpainiaren akzioak gero eta balore handiagoa dute.
Ez dago gehiago eskatzerik. Amets amerikarrean sinistu beharrean gaude, galdetu bestela Dionisio Txoperenari.