Erretor berria izanen da laster Senperen: Frantxoa Garat. Beñat Ameztoy, azken sei urteotan senpertarren artzaina izan dena, Donibane Garazirat igortzea deliberatu du Baionako apezpikuak. Agorrilaren 9ko agurreko meza biziki hunkigarria ospatu zen. Jondoni Petri eliza jendez mukuru betea zen, batzuk adinekoak eta bertze ainitz gazteak. Horrek ongi erakusterat eman zuen senpertarrek zonbait maite dugun Bidarraiko semea.
Bere lana goraipatzeko hitzaldietan, sei urtez itzalik ez zaiola ikusi aipatu zuten batzuek eta bertze batzuek eskerrak eman ziozkaten. Esku zartak ere bi aldiz entzun ziren meza denboran, Ameztoyen egonaldia eskertzeko lehenik eta gero dantzariek eskaini zuten agurraren ondotik. Bere aldetik ere Beñat Ameztoyk eskerrak eman zizkien girixtinoei meza ez baita sekulan gelditu osasun arazoak ere izan dituelarik. Nahi eta ezin ibili delarik, norbaitek segida hartu duela beti ez du sekulan ahantziko.
Mezatik ateratzean, Herriko Etxearen izenean, andere auzapezak, oroitarri bat eskaini zion orain arte gure apeza izan denari. Bere leloa Ez bil, hurbil! erranaldia da, eta dudarik gabe ideia horri esker egiten ditu hain laster hainbertze adiskide. Bere agurrean, gerlan beso bat galdu zuen Bidarraiko postariaren historia kondatu zuen. Zera erraten omen zuen postariak: «lehen idazkera ederragoa nuen eta orain ortografia hobea dut!». Beti moldatu eta beti aintzina segitu. Senpertar gehienek bihotzetik hori desiratzen diote Ameztoyri. Milesker eta bide on, agian osasun hobearekin...