Aurtengo Amabirjinetako zenbait une betirako geldituko dira goizuetar askoren bihotzetan eta erretinan. «Momentiko» horien protagonista nagusiak, jakina, Umore Onaren fundatzaileak izan ziren. Ahaztezinak beraiek botatako itxaferoa, eta Peñaren Eguneko diana, pilota plazako omenaldi ekitaldia eta ilunabarrean Ganddegiko atarian Luis Elizegi buru zuen txarangak peñakide beteranoen eskutik jasotako agurra.
Giroa-berrikuntzak
Festa giroa, bestalde, aparta izan da aurten ere. Igande eta astelehen arratseko lasaitasunaren ondoren, asteartean kaleak, tabernak eta txosnak bete egin ziren berriz, ostiralean eta larunbatean bezalaxe. Aipagarria, gainera, berrikuntzek izan duten arrakasta. Astearte arratsean gainezka bete zen plaza festei bukaera ofiziala emateko lehenbiziko aldiz antolatutako ekitaldian. Eta Peñaren historia irudikatzen zuen 600 argazkiko erakusketak ehunka lagunen bisita jaso zuen.
Glamourra
Edozein jaialdi edo goi mailako ebentok pertsonaia ezagunak erakartzea izaten du helburu. Ba gure festek lortu dute hori ere, oheratzeko presarik gabe etorritako izarrak ikus baitzitezkeen herrian asteartearekin, 18an: goi-goi mailako pilotariak eta harri-jasotzaileak, tourrean etapak irabazitako txirrindulariak eta abar.