Aurten ez da Bai Euskarari Ziurtagiriaren ekitaldirik eginen Leitzaldean, bi urtetik behin eginen delako, baina halere, ziurtagiria indartzeko lanean segitzen du Leitza, Goizueta, Areso eta Aranoko Euskara Zerbitzuak. Bai Euskarari Ziurtagiriaren Elkartea pertsona bat kontratatzekoa da ziurtagiria duten entitate guztiengana joan eta bakoitzak dituen konpromisoen eta bakoitzaren egoeraren segimendua egiteko. Horren arabera, elkarteak ziurtagiria berrituko lieke. Gisa berean, ziurtagirik ez duten entitateei ere eskuratzeko gonbitea egin nahi die Euskara Zerbitzuak.
Proiektuak
Bestalde, hainbat dira Euskara Zerbitzuak aurten landu dituen proiektuak. Goizuetan, Kultur Taldearekin batera, Xapo aldizkariaren 8. alean kaleratu dute hilabete honetan. Ordenagailuan euskaraz lan egin eta software librea erabiltzeko ikastaro bat ere egin dute eta irakurzaletasuna bultzatzeko euskarazko produktuak paratu zituzten Txino auzoko bestetan.
Ludoteka
Bestalde, urritik maiatzera ludoteka abiatu zuen Leitzan eta Areson. Ikasturtea ostegun honetan Areson eta ostiralean Leitzan bukatuko da. Gainera, aurten ere udarako aisaildi eskaintza antolatu da Leitzan: Haur Txokoa eta tailerra gaztetxoentzako.
Helbide elektroniko berria
Azkenik, esan, helbide elektroniko berria duela Euskara Zerbitzuak: laga@iparmank.org. Hona helbidearen azalpena: laga, ‘L’eitza, ‘A’reso, ‘G’oizueta eta ‘A’rano eta iparmank, ’ipar’raldeko ‘mank’omunitatea.