Leitzako Aurrera Perra elkarteak, Plazaolako Partzuergo Turistikoaren, Leitzako Udalaren eta bertze zenbait erakunde eta komertzioen laguntzaz, hirugarren urtez antolatutako Zaldiaren Eguna ospatu zen larunbatean, irailaren 13an. Inguruarten, zaldiarekin lotutako hainbat ekitaldi ikusi eta egiteko aukera izan zen. Leitza inguruan zaldietarako afizio handia dagoela ederki ikusi zen larunbatean Leitzan, eguraldi euritsuari aurre eginez 80 zaldi inguru elkartu baitziren.
Leitzatrek proba
Lehenik, Guratz-Peruarri ibilbidea egin zuten. Inguruarten, Leitzatrek erakustaldia eskaini zuten. Hain zuzen, trekarekin, zaldiak mendi inguruetan edo zaldi turismoan ibiltzeko dituen trebetasunak erakusten dira, hala nola, koxkak igo, jautsi eta bertze. Zaldi-gurdietan ibiltzeko, zaldiak eta pottokak ikusteko eta perratze erakustaldiak ikusteko aukera ere izan zen. Itxuraz ez ziren zailtasun edo arrisku handiko probak, baina zaldiaren izaera eta heziketa ona erakusteko arras baliagarriak.
Zikiro-jatea
Eguerdi partean plazan zaldi proba eta zikiro-jatea izan zen. Arratsaldean segida izan zuten Inguruarteko ekitaldiek eta heziketa edo doma mota ezberdinak ikusteko aukera izan zen: heziketa naturala, western, espainiarra eta bertze… Zaldiaren Eguna akautzeko, Aurrera elkartean zaldiekin eta zaldunekin hain lotua dagoen country musika aditzeko aukera izan zen, Lobo & Carmina taldearekin.