Jende asko elkartu zen aurtengoan ere San Roke ermitan 11:00etako meza entzuter. Bukatutakoan kalejira egin zen herrirako bidean eta pilota partidak ere bai urteroko ohitura mantenduz. Kontzeju tabernan bazkaldu ondoren Joxan Ruiz omendu zuten, 1970etik jai hau antolatzeaz arduratzeagaitik, egindako lan bikaina eskertu nahian. Agurra dantzatu eta plakak eta lore sorta eman zizkioten Joxan Ruiz eta Maitere Miner bere emazteari. Ondoren, Aranoko Martxa kantatu zuten, Patxi Apezetxea txistulariak egindakoa eta Xabier Legarreta bertsolariak hitza jarrita.
Aranoko Martxa
Iturri, lur, haritz eta pago/ erreka, bi-xenda eta basuak/. Harri, abere eta famili, etxe, baserri eta auzuak/. Mendez-mende, gizaldiz-gizaldi/ gurasuen gurasuen gurasuak/, zeukatena maite zutelako/ gero zetozenentzako jasuak. Irauteko borrokatzen duten/ harrizko pareten joan etorria/; itsasoa lur naparrarekin/ bat egiten duten lokarria/.Artzaien nekea saihesteko/goienean eraikitako herria/. bailara oso baten gainetik/ beragokoak zaintzeko jarria/.