• Basa-Kabi jatetxe-hotel ezaguneko sukaldaria da Alex Mujika. Sortzez donostiarra baina txikitatik Leitzan bizi da. Gazterik barneratu zen sukaldaritzan, gurasoak Basa-Kabiko jabeak baitziren.
• Duela bi urte Ayer y hoy de la cocina Navarra (Nafarroako sukaldaritzaren lehena eta oraina) liburua kaleratu zuen, gazteleraz. Berriki, berriz, Reciclaje y alta cocina (Birziklatzea eta goi sukaldaritza) argitaratu du, eta Gourmand saria jaso du.
• Irudimena landuz, soberan
gelditu diren janariekin egiteko
24 errezeta bildu ditu liburuan.
Zergatik eta noiz sartu zinen sukaldaritzaren munduan?
Txikitatik etxean sukaldeko martxa ezagutu dut eta nahi gabe sartu ginen mundu honetan. Basa-Kabi jatetxe-hotelean hazia naiz, eta hau izan nuen lehen eskola.18 urterekin Donostiako Rekondo jatetxean sukaldaritza tradizionala ikasten hasi nintzen eta handik Madrilera jo nuen, eta han Luis Irizarrekin egon nintzen. Urte batzuk pasatu nituen berarekin. Neguan han egoten nintzen eta udan honat etorri eta plater berriak kartan paratzen nituen Basa-Kabin. Baina nire sukaldearen oinarria nire amarena da.
Sukaldaritza arloan aholkularitza enpresa bat ere baduzu...
Bai, lehenago jatetxeko lanarekin bateratzen nuen baina azkenean ardura nire gain bakarrik gelditu zen eta dena ezin nuela eta jatetxea uztea erabaki nuen. Basa-Kabira platerak prestatzera etortzen naiz eta gero hemendik kanpora eramaten ditut.
Lekuaren arabera, sukaldaritza egokitu egin behar al da?
Euskaldun, andaluziar edo ingeles baten gustua ez da berdina, baina guk hemengo sukaldaritza eramaten dugu beste lekuetara. Hemengo sukaldaritza garrantzitsuenetarikoa da mundu mailan eta jendeak maite du.
Sukaldaritzari buruzko bigarren liburua argitaratu duzu aurten...
Orain bi urte Ayer y hoy de la cocina Navarra kaleratu nuen, duela 20-30 urte eta orain Nafarroako platerak nola egiten diren erakusteko. Osagai berdinekin izanagatik ere, platerak oso desberdinak dira, eta Nafarroako sukaldaritzak nolako garapena izan duen erakutsi nahi nuen. Lana gogorra izan zen baina gustura gelditu nintzen. Eta orain bigarrena atera dut.
Sukaldean ere birziklatu daiteke. Soberan gelditzen zaigun janariarekin zer egin dezakegun jakinaraztea da liburu honen filosofia. 24 plater diferente ageri dira Reciclaje y alta cocina liburuan. Etxean normalean soberan gelditzen zaigunarekin krema egin edo berotu egiten da. Liburu honetan, ordea, bestelako aukera batzuk planteatzen ditugu. Irudimena landuz plater oso diferenteak egin daitezke.
Zein da zuri gehien gustatzen zaizun errezeta?
Akaso kuriosoena delako garbantzoekin txurroak egitearena. Sobratutako garbantzoei ura kendu, eta turmixean edo thermomixean pasatu eta pure bat eginez txurroak egiteko masa lortzen da. Masa loditzeko irina eman diezaiokegu. Txurroen formara jarri masa eta olio bero-berora bota eta prest! Azukrea bota beharrean, piperrautsa eta gatza nahasita botatzen ahal zaio.
Sari bat ere jaso duzu...
Gourmand saria eman didate bigarren liburu honengatik, Espainiako sukaldaritzako chef onenaren saria. Prestigioa ematen du horrek eta niretzat behintzat sari garrantzitsua da.