EHAK eta EAE-ANV alderdi independisten suspentsioa salatzeko ezker abertzaleak bultzatutako deialdi ezberdinek erantzun haundia jaso zuten herrian. Kontzentrazioak jendetsuak izan ziren, eta gainera, hilaren 14ko greba erabatekoa izan zen.
Hilaren 12an aparteko plenoa burutu zen Herriko Etxean Garzon epaileak sinatutako eraso hauek salatu asmoz. ANVk aurkeztutako mozioak zioenez, independentziari ateak itxi nahia da, besteak beste, suspentsioen helburua. Udalak larritzat jotzen du hau, eskubideen kontrako erasoa delako eta independistak «kriminalizatzen» dituelako. Honetaz gain, Udalbatzak babes osoa eskaini zien ANV taldeko kideei. Aho batez onartu zen mozioa, baita hilaren 16an plazan kontzentratzeko deialdia ere.