Aitor Etxarri, Nafarroa Bai alderdiko parlamentariak eta Leitzako EAko zinegotziak galdera aurkeztu dio Parlamentuko Bozeramaleen Mahai eta Batzordeari. Amazabal Institutuaren eta Erleta eskolaren ondoan dagoen Nafarroako Gobernuaren eraikinari zer erabilera emanen dion galdetu du Etxarrik. Garai batean, gazteen aterpe gisara erabiltzen zen, baina gaur egun eraikina ez da deustarako erabiltzen. Nafarroako Gobernuak Leitzako udalari uztea ere aurreikusi ote duen galdetu zuen Etxarrik.
Nafarroa Bai alderdiaren ustez, “interes bereziko eremua da, beste gauza batzuetarako erabilgarria. Esate baterako, Leitzan hain beharrezkoak diren ludoteka, filmoteka, kultur etxea edo gazteen lokala bertan jarri daitezke, bete aukera batzuen artean”. Aitor Etxarriren ustez, “gaur egun Leitzako kultur jarduera sakabanatua dago, eta hau zentralizatzeko aukera izanen litzateke, toki handia baita, lau solairu eta ganbararekin. Bizilagunek aprobetxatu behar duten leku egokia iruditzen zaigu”.
Nafarroako Gobernuari lanean hasteko eskatu dio Etxarrik. “Eraikina hor dugu eta zentzugabea da ez erabiltzea, Leitzan horrelako lekuak falta direnean”.