Gure eskualdeko hiru eskoletako haurrak eta gurasoak herrian elkartuko dira larunbat honetan, hilak 21, dagoeneko ohiko bihurtu diren topaketen zortzigarren edizioan.
11:30ean dute hitzordua goizuetarrek, aresoarrek, leitzarrek eta aranoarrek, ordu horretan hasiko baitira «Joko kooperatibo eta betikoak». Kalejira eginen dute ondoren herriko txistulariekin eta Leitza eta Aresoko dantzariekin, eta herrian barrena ibilitakoan, Xalto eskolako jangelan bazkalduko dute. Arratsaldean hainbat jarduera izanen dituzte Ganbaran. Txokolatadarekin eta plazako agurrarekin bukatuko dira zortzigarren topaketa hauek. Lau herrietako prebentzio programak eta hiru eskoletako guraso elkarteak dira jardunaldiaren antolatzaileak.