Azken bi hilabete hauetan antolakuntza taldea egiten ari den lanari esker, azaroaren azken larunbatean eginen den azinda eta artisau feriaren hirugarren ediziorako dena prest dagoela aurreratu daiteke dagoeneko.
Eguneko gauzarik garrantzitsuena azoka izanen da, jakina, baina horren aitzakian antolatzen diren ekitaldiak ere hagitz aipagarriak dira. Esate baterako, herri bazkarian ehundaka lagunen partehartzea espero da. Aurten, gainera, berogailua jarriko da Lubineko frontoian, eta honi, Kupela taldeari gehitzen baldin badiogu, pilota plazako giroa nolako izanen den aurreikus daiteke aisa. Bazkarirako txartelak Urrutinea eta Amaiarenean daude salgai.
Goizeko 10etan irekiko den azokan, programan agertzen ez diren hainbat ustegabeko ekitaldiak ere izanen dira. Bukatzeko esan, herritarrei eta kanpotik datozenei baserritarraz janzteko deialdia luzatzen dietela antolatzaileek.