Larunbat honetan, abenduak 22, arratsaldeko 16:30etatik aurrera eskolako jangelan burutuko den saioa bukatutakoan jakinen da Xalto Sariaren seigarren edizioaren irabazlea. Nafarroa eta Iparraldeko zortzi bertsolari gazte hoberenek kantatuko dute bertan. Goizuetako final haundian partaide izan aurretik lau kanporaketa gogor gaindituak izanen dituzte, ederki entrenatuak etorriko dira beraz. Gure herrian ospatzen den sariketa honen garrantzia adierazteko nahikoa izanen da aurreko bost edizioen irabazleen izenak oroitaraztea: lehenengo biak Estitxu Arozenak eraman zituen, hurrengoa Xabier Silveirak, eta bi azkenekoak Xabier Legarretak eta Amets Arzallusek, hurrenez hurren.