Ruben Saralegi leitzarrak martxoaren 10ean, estreinakoz jokatuko du apustua. Xabier Mindegia izanen du aurrez aurre, Doneztebeko eskolako pilotalekuan 12:30ean hasiko den norgehiagokan. Lan luzea izanen dute aitzinetik: 10 kanaerdiko eta bi oinbiko ebaki beharko baitituzte. Aizkolari bakoitzak 3.000 euro jarri ditu eta norgehiagoka ikusi nahi dutenek sarrera 30 euro ordaindu beharko dute.
Ikusmin handia sortu duen apustua da, Nafarroako II.mailako aizkora txapelketako finala gogoan baitute askok. Saralegi eta Mindegia finalistak izan ziren, leitzarrak lortu zuen garaipena eta Mindegia txapeldun ordea izan zen, 48 segundora.