Gero, gorputz osoari astinaldi ederra eman dio ezker-eskuin hiruzpalau aldiz, eta bere ile fin xuri-beltzak nonahi sakabanatu ditu. Gibeleko zangoetako bat erdi lokartua duenez, mainguka etorri da niregana, eta hortxe jarri da esperoan, adi, frutari begira.
Burura etorri zait, orduan, etxekook tontakeriak irakatsi dizkiogun bitartean (eseri, etzin, xutik, txiribuelta...), berak zenbat irakaspen baliotsu eman dizkigun. Sagarrarekin bezala: guk horren bihotza baino ez diegu ematen, baina beraiek oso-osorik eskaintzen digute beraiena.