Etsaiak lagun

Erabiltzailearen aurpegia

Barraskiloekin gerran nago. Gure etxeko balkoi nanora ageri ohi dira ditugun landare pixarrak jatera: albaka, oreganoa, aloeak... Baina, nondik heldu dira? Hormigoizko eraikuntza zaharkituz inguraturik gaude, ez dago berdegunerik inguruan, eta, halere, hemen daude; ausart, lotsagabe, probokatzaile. Misterioa da: paretak eskalatuko ote dituzte?

Horiez gain, bertze batzuk ere azaltzen zaizkigu etxean: astero-astero, herriko nekazari gazte batek ekartzen digu barazki-saskia, eta, bertan ere, karakolak egoten dira; ttikiagoak, bai, baina egon badaude. Dena dela, jarrera ezberdina dutela erranen nuke: alai, natural, lasai. Eta, finean, azken horietaz ez naiz kexu, seinale ona baita erosten ditugun barazkietan bizia egotea: osasunaren isla da, eta aski ongi ikasia dugu hori zeinen garrantzitsua den, ezta?

Oi, barraskilo! Batzuetan, etsai eta, bertzeetan, lagun: gogoz kontra, baina, balkoia parteka dezagun!

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun