Gatazka batean, eraso batean, bidegabekeria egoera batean… ez posizionatzea neutrala izatea da? Deus ez egitea neutrala izatea da? Deus ez erratea neutrala izatea da? Neutrala hitza dagoen tokian aditza errepikatu eta galdera beharrean puntua paratzea aski da, esaldiaren erranahia aldatzeko. Aldaketa ttipi batek aldaketa handia ekartzen ahal baitu.
Ez posizionatzea, posizionatzea da. Deus ez egitea, egitea da. Deus ez erratea, erratea da. Goitiko esaldietan neutral kentzeak, neutraltasuna kentzen dio gure jarrerari, neutraltasuna ez baita existitzen. Neutraltasun(ez)aren izenean erran (ez) eta egiten (ez) ditugunak non kokatzen garen adierazten digu. Gatazka batean posizionatzen ez dela dioenak irabazlearen alde egin ohi du normalean, neutrala dela dioenak boterearekin bat egin ohi du, eta ustez neutral izan nahian isiltzen denak anitz erraten du. Zer dio isiltzen denak isiltzen denean?
Zenbait egoeratan isiltasunak konplize bihurtzen gaituela ikasi dugu, isiltasuna hausteko ordua dela…Herrian, familian, lagunartean, eskolan… edozein bidegabekeriaren aitzinean salatu egin behar dela diogu, baina aldi berean, gu geroni gara zenbait gai isilpean uzten ditugunak «gatazkarik ez sortzeko».
Hondar hilabete hauetan gure herrietan, familietan eta lagunartean anitz solastatu da Aroztegiko aferaren inguruan. Eta eskoletan? Baztango eskoletan eman zaio tokia gure errealitatea irauliko lukeen proiektua azaltzeari? Edo neutraltasunaren izenean gaia ez aipatzea da hautatu den bidea? Aroztegiko afera Baztango eskoletan ez lantzea neutral jokatzea da? Baztandarron lurrak ebastea eta horren berri ez ematea neutral jokatzea da? Zazpi baztandar denon lurrak defendatzeagatik kartzela arriskuan egon eta horren berri ez ematea neutral jokatzea da? Lekaroz euskararen arnasgune izatetik, euskara itotzera eramanen lukeen proiektua ez aipatzea neutral jokatzea da? Baztango egitura irauliko lukeen egoeraren berri ez ematea neutral jokatzea da?
Hezkuntzaren betebeharra eta ardura da gure errealitatearen berri ematea, kontzientzia hartzea, hausnartzea, iritzi kritikoa piztea… Bizi garen tokiak baldintzatzen eta zeharkatzen gaitu gu eta gure bizimodua, hortaz, gure ardura eta erantzukizuna ere bada inguratzen gaituzten errealitate eta gatazken berri ematea.
Zapalkuntza baten aitzinean ez da ezikusiarena egiten ahal. Bidegabekeria baten aitzinean neutrala izatea zapaltzailearen alde egitea baita. Hortaz, ni ez naiz neutrala (eta zu ere ez).