Abenduaren 26an, berriz, Banztango Banda Rekreo bandaren kontzertua izan zen Anizko elizan. Eliza jendez lepo bete zen musikarien emanaldia aditzera,
Ilbeltzaren 1ean, Urtats egunean, haurrak etxez etxe ibili ziren urtetxak eskatuz. Espreskuki egun honetarako jositako sakela handiko mandarrak soinean paratuta, etxe guztietan kantatu ondotik etxekoandre edo etxekogizonak larrainerat botatako mandarinak, intxaurrak, litxarreriak...bildu, eta ondoko etxerat. Berriz ere kantatzera:
Urte berri-berri, zer dakarrazu berri, uraren gainean, bakea eta osasuna, urtets-urtets... urtetxak nahi tugu.
Urte xahar, nik atorra zahar, maunkarik ez, nik axolarik ez.
Aingeruak gara, zerutik heldu gara, boltsa badugu, dirurikan ez dugu, urtetx-urtex, urtetxak nahi tugu.
Xori-xori landa, xoria konpainia, etxe hunteko etxeko andria, leihoan balego, leihoan balego, atiak eta leihoak ereki, eta bota urtetxak!
Heldu den astean inauteriak
Eguberriak akituz bezala, atsedenerako tarterik gabe, inauteriak izanen ditugu Anizen. Olentzero eta Urtats egunean etxeko ateak haurrei ireki bazitzaizkien, ilbeltzaren 14an, gazteei irekiko zaizkie etxeetako ateak. Ortziralean afaria izanen da elkartean, basurde jatea. Larunbatean,berriz, gosariarekin hasiko dute eguna Anizko eta Berroetako gazteek. Gosaldu ondotik, etxez etxe ibiliko dira puxkak biltzen: arroltze, xingar, txixtor...
Egun guztia etxez etxe jan-edanean, solasean, kantuan... pasatu ondotik, etxeetan bildutako puxkekin afaria izanen da elkartean.
Ondoko astean, ilbeltzaren 21ean, gauza bera izanen da, baina kasu honetan aniztarrak izanen dira Berroetarat joanen direnak.