Gibelat utzi beharrekoak

Erabiltzailearen aurpegia Maialen Iantzi Danboriena 2020ko urr. 31a, 10:00

Emakume baten gorputza tartean dagoenean, emakume horrek zer egiten duen eta zer ez epaitzeko eskubidea dutela sentitzen dute pertsona anitzek. Zer emakumeri ez zaio gertatu bizkotxo zati bat ukatu eta bueltan «jope, gaur egungo emakumeek nola zaintzen duzuen zuen burua» edo «trankil, honek ez du loditzen» aditzea. Edo kontrakoa, postrea errepikatu eta «kasu e, uda hurbiltzen ari da eta!». Eta ez janari kontuetan bakarrik, kirola egitean ere ez baitira guti aditu beharreko komentarioak.

Gizartea mantso-mantso aldatzen ari dela ematen duen honetan, zenbaiti kostatu egiten zaie bere epaiak alde batera uztea. Ez da hain zaila entenditzea; janariari ezetz erraten badiogu, momentu horretan ez dugulako jateko gogorik da, puntu. Eta lasterka egitera joaten bagara, ez da gure ipurdiak gogortu edo bikinian hobe sartzeko; kirola egin nahi dugulako da, bertzerik gabe. Hurrengo egunean horrelako epai bat egiteko gogoa baduzue, aholku xume bat: eskaintzen duzuen bizkotxo puska eder bat ahoan sartu eta hausnartu, anitzetan ahoa ixtea baita gauzak errateko modurik egokiena.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun