Zaintzen mahai-inguruan Trabajadoras no domesticadaseko kideak, Batera zaintza taldea eta Artea Herriko Bentako ordezkariak aritu ziren esperientzia trukean. Azken honetako kide den Olatz Talaveraren hitzetan Arteako esperientziak bi lanketa egiten ditu: «Errefuxiatuen harreraren zergatia salatzen dugu etengabe eta, aldi berean, herria antolatzen aritzen gara harrera beharrezkoa den bitartean erantzuteko gai izan gaitezen». Salatu eta herria antolatu, egunerokoan biak uztartzearen garrantzia nabarmentzekoa iruditzen zait, bertze hainbat gizarte ekimenerako baliagarri.
«Militantzia eredu berrietan auzi garrantzitsua dugu jokoan oraintxe Euskal Herriko gizarteko alor anitzetan»
Bere aldetik, Larreko mahaiko Lorea Floresek profiletan jarri zuen fokua, bertzeak bertze, honakoa erranez: «ekologiaren bueltan bi profil ditugu: ohiko militanteak, 50 urtez goitiko gizon zuri, buruzuri eta euskaldunak batetik; bertzetik, Fridays For Futureren gisakoetatik etorritako 30 urtez azpiko emakume ez beti zuri eta ez beti euskaldunak. Horrek hizkuntza talka ekarri zuen. (...) Egun neskak ez daude talde motorrean». Nire ustez, militantzia eredu berrietan auzi garrantzitsua dugu jokoan oraintxe Euskal Herriko gizarteko alor anitzetan eta, ondorioen bistan, erantzunarekin asmatzeko formulak pentsatzeari energia gehiago eskaini beharko diogula uste dut. Halaber, Floresek hau aipatu zuen aitzinera begira: «erronka da larrialdi ekologikoari buruz aritzeko Euskal Herriko artikulazio gune bat sortzea. Nolako Euskal Herria nahi dugun elkarrekin hausnartu eta alternatibak kolektiboki proposatzeko». Gure eguneroko ekintzen ondorio edo inpaktua neurtu eta nolako herri, auzo edo komunitate nahi dugun elkarrekin pentsatzeko hau baino momentu hoberik nekez izanen dugu.
Azkenik, Zaldibar Argitu plataformatik Jokin Bergarak nerbio antropologikoari egin zion erreferentzia bere hitzaldiaren bukaeran eta identitatea kontsumoan eraikitzen duen gizarte batean autokontentzioa praktikatzearen alde egin zuen neurriz kanpoko kontsumoa geldiarazteko eskura dugun baliabide gisa eta aberastasun immateriala hauspotzera gonbidatu gintuen. Horretarako ere bada tenorea: zertan gara aberats(ago) edo pobre(ago) azken urtean?