Baina zer da hau? Zer errespetu ttikia udazkenari! Eta negua? Nola etorriko zaigu negua? Behar den bezalako ilun, hotz eta bustia? Ikusiko ote dugu elurrik? Kraskatuko ote dugu hormarik? Aiiii, esperantza guti... Lehengo neguak gogorrak omen ziren. Kantak hala dio: «Elurra teilatuan zakua lepuan ibili beharko degu aurtengo neguan…». Bertze kanta batek ere abisatzen du noiz ailegatuko den negua: «San Simon eta San Judas, joan zen uda eta negua heldu da...». Xabier Lete neguaren hotzaz ari zaigu: «Ni naiz neguko eguzkitan hotzez hiltzen dagoen gizon bakartia».
Lehengoek bazuten neguari buruzko segurtasuna. Guk, berriz, ingurumena erotu dugu, eta erreferentziarik gabe gelditu gara. Beldur naiz behar den bezalako negua ez ote dugun betiko galdua. Zea Maysek kantatzen duen bezala, «negua joan da ta».