Lagun baten bidez jakin genuen, eskualdeko eraikuntza enpresa handienak urteurren festa antolatu zuela, herritarrei egitarau tentagarri eta ponposoa eskainiz. «Zementuak eta hondamenera garamatzaten obrek finantzatutako besta» jar zezakeen sarrerako atean, edo, «Gozatu iberikoez eta pateaz, eman eskerrak Abiadura Handiko Trenari».
Ezin ukatu jokaldi perfektua denik. Bat: herritarron zergekin proiektu txikitzaile eta xahutzaileak finantzatzen ditu gobernuak. Bi: honek, urtero ehunka milaka euroko irabaziak dituen enpresari dirutza ordaintzen dio lanengatik. Hiru: enpresak, bere irabazien zati txikitxiki-nano batekin herritarrentzako puntako festibala antolatzen du, kutsu herrikoi, keinu solidario eta guzi.
Denok pozik, ezta? Bada, beti gaizki pentsatzen dugun erretxinak izanen gara agian, baina segituan bururatu zitzaigun: ez al da botere erakustaldi eta aurpegi zuriketa nabarmena? Tira, baina egia da, betekada baten ondoren pentsatzeko gaitasuna guk ere galtzen dugula…