Larunbatean jokatu zen bi urtetik behin egiten den bertsolari gazteentzako Xalto sariketa. Goizuetako udaletxeko ganbaran, Nafarroako hamalau bertsolari aritu ziren, eta goizeko eta arratsaldeko saioen ondoren Jon Elizetxe gartzaindarrak jantzi zuen txapela.
Goizuetako feria egunean, giro ezin hobean, egin zen aurtengo Xalto. Lehiaz haratago, sariketa honek Nafarroako bertsolari gazteen sustapenerako eta trebatzerako bide eman nahi du eta aurten ere helburu hori bete du.
Iaz izaera beretsua duen Mariano Izeta sariketa eskuratu ondoren, aurten Xalto irabazi du Jon Elizetxek. Hala ere, sailkapena estu-estu joan zen; Elizetxeren atzetik puntu erdira Aimar Karrika auriztarra sailkatu zen, eta haren puntu erdira, Eneko Lazkoz etxarriara sailkatu zen. Horiekin batera, Saioa Alkaiza, Joseba Beltza eta Josu Sanjurjo izan ziren finalean.
Aurtengo Xalto sariketan honako bertsolariek hartu zuten parte: Aimar Karrika, Joseba Beltza, Alazne Untxalo, Egoitz Gorosterrazu, Eneko Lazkoz, Iker Gorosterrazu, Ioar Tainta, Jon Elizetxe, Oier Lakuntza, Saioa Alkaiza, Iñaki Aleman, Josu Sanjurjo, Jose Luis Barberia “Zili” eta Joseba Zabaleta. Azken bi hauek Leitzako bertso eskolako kideak dira eta estreinakoz aritu ziren bertsotan taula gainean.
Nafarroako Bertsozale Elkartea da Xalto sariketaren antolatzailea, eta Goizuetako Udalak emandako laguntza eskertu nahi du. Horrez gain, Euskarabidea eta Eusko Jaurlaritzako Kultura Sailaren babesa ere izan du sariketak.