Unai Ruiz eta Naroa Martinezen 'Afonia' obra argitaratua Pamiela argitaletxearen eskutik

AFONIA lanak isiltzen ari den ahots baten baitako istorioa kontatzen du. Atentzioa jarriz, oraindik aditu ahal den ahots baten istorioa. 

Onomatopeia bidez adierazitako ezkila-jotze bakoitzaren esanahia kontatzeko asmoa islatzen du albumak. Aitonaren ahotsa oihartzun bihurtzen den heinean, kontakizunak amonaren zein lagunen bitartez ailegatzen dira.

Tradizioaren aztarnei segika, obrak dolua eta galtzen ari denaren pena ditu oinarri. Memoriaren bidez ondoan mantentzen denaren aldeko aldarria eginez eta oroitzen dena bizirik mantentzen dela ideia azpimarratuz. Hala, transmisioak eta tradizioak bizirik irauten du aitonaren bideari eusten dion ilobari esker. Berako Unai Ruizen ilustrazioak eta Gasteizko Naroa Martinezen testuak bat egiten dute elkarrizketa ezberdinak proposatuz.

Etxepare Saria 2027

Hurrengo urteko sarietan lehiatu ahal izateko, haurrei zuzendutako album ilustratua aurkeztu behar da, testua eta irudia uztartuz, banaka edo taldeka. Obrak aurkezteko epea maiatza aldera itxi egiten da eta nahi bertze lan aurkeztu daitezke. 

Ekainaren akaberan jakinarazten dira irabazleak, eta hauek 5000 euroko saria izateaz gain, Pamiela argitaletxearekin batera albuma argitaratzeko aukera izanen dute. 

2027ko lehen hilabeteetan zehaztuko dituzte 2027ko Etxepare Sarian parte hartzeko oinarri zehatzak.