Lesakako Udalak eta Orekanek sinatutako hitzarmenaren bidez, Amargungo herri lurretan 3,75 Hektareako eremua erabiliko da ikerketarako
Lesakako Udalak ikerketa honen garrantzia azpimarratu nahi du, etorkizuneko oihan berritzeak hobeki planifikatzeko eta klima aldaketak gure inguruko mendietan izan ditzakeen ondorioak ezagutzeko baliagarria izanen baita.
Ekimen hau Reinfforce2 eta Cooptree Europako proiektuen barrenean kokatzen da.
Ladis Satrustegi alkateak nabarmendu duenez, «ikerketa honek lagunduko digu ulertzen nola aurre egin behar diegun etorkizuneko landaketei eta zer eragin izan ditzakeen klimaren aldaketak gure oihanetan, ikuspuntu lokal eta pertsonalizatu batetik. In situ ikusi ahal izanen dugu nola eboluzionatzen duten landareek, eta horrek aukera emanen digu datozen urteetako errealitatera hobeki egokitzen diren politika publikoak ezartzeko».