Publiko guztiarentzat eskainiko den pilates eta kickboxing saioekin hasiko da eguna goizeko bederatzietan. Ondotik, 10:00etan, merkatua irekiko dute bertako merkatari eta zerbitzuek, eta jatekoaz eta edatekoaz gozatzeko aukera ere egonen da jarriko duten barran, pintxo bereziak tarte. 12:00etan herri kirolak izanen dira eta 13:30ean Gure Txokoa dantza taldeak emanaldia eskainiko du. Goizetik ilunabarrera arte, kale animazioa izanen da harat eta honat herritik bueltaka gaitero eta trikitilariekin.
Arratsaldean, haurren txokoa irekiko dute 16:00etatik aitzin, aktibitateak, jolasak eta animazioak eskainiz herriko txikienentzat eta azkenik, 18:00etan, tonbola eginen da kiroldegian. Telebistak, etxetresnak, bidaiak eta abar luze bat egonen dira jokoan berako herritarren artean. Opariak jasotzeko bertan egotea beharrezkoa dela adierazi du elkarteak.
Eguna borobiltzeko dj sorpresa egonen dela ere iragarri dute.