Urriaren 9tik 11ra Igantziko Irrisarrin jokatuko den Espainiako txapelketa ere prestatzen ari dira
2026-2027 denboraldia, berriz, abuztuaren 22an eta 23an Lekunberrin jokatu den Aralar Desafioarekin abiatu da, Espainiako Koparako baliagarria den lehenbiziko proba, hain zuzen. Baxi Basajauna Elkarteko hiru jokalarik hartu zuten parte: Iñaki Gonzalez MP60 kategorian eta Ion Juguera eta Fernando Zabalza MA4 kategorian. Hirurak podiumera igo ziren; Iñaki Gonzalez txapeldun izan zen eta Ion Juguera bigarren eta Fernando Zabalza hirugarren. Iñaki Gonzalezek txapelketako bigarren txartel onena egin zuen, bere maila erakutsiz.
Lekunberriko probaren ondotik, Espainiako Koparen zazpigarren edizioak bertze bortz proba izanen ditu: irailaren 26an eta 27an Santiagon VI Open Xacobeo; urriaren 3an eta 4an Bilbon IV. Bizkaiko Irekia; azaroaren 28an eta 29an Madrilen Intermad 5.0, martxoaren 6an eta 7an Chipionan (Cadiz) jokatuko den txapelketa eta uztailaren 3an eta 4an Oviedoko VII. Irekia.
Espainiako Txapelketa urriaren 9tik 11ra Igantzin
Aipatzekoa da aurtengoan Espainiako Disko Golf Txapelketa Igantziko Irrisarriko zelaian jokatuko dela urriaren 9tik 11ra eta horren antolaketan ere hasia da Baxi Bajauna elkartea.
Disko golfa Lesakako udalekuetan
Lesakako Kirol Udalekuetan aurten disko golfa sartu dute. Baxi Basajaunako Mikel Ibarrola Lesakako Mugi udalekuko Ganix Arruti monitorearekin egon zen eta azalpen batzuk eman zizkion. Saio bat prestatu ondotik, kirol udalekuetan disko golfean jostetan gustura ibili dira haurrak.