Nafarroako hirugarren mailako aizkolari txapelketaren finala jokatuko da abuztuaren 15ean, larunbatean 18:00etan hasita, Arantzako pilotalekuan. Iruñeko sanferminetan jokatutako kanporaketan hamabortz aizkolari aritu ziren eta bortzek lortu zuten finalerako txartela: Iker Goldarazena (Berriozar), Xabier Mitxelena (Irurita), Unai Valverde (El Espinar-Segovia), Jose Maria Benito (Valsain-Segovia) eta Urko Erize (Osakar). Lau enbor moztu beharko dituzte, bina 45 ontzako eta kanaerdiko eta bi lehenbizikoek bigarren mailara igatea lortuko dute.
Lokotx biltze txapelketak ere
Aizkolariak ez ezik, lokotx biltzaileak ere ariko dira Arantzako jaialdian eta emakumezkoen nahiz gizonezkoen Nafarroako txapelak banatuko dituzte. Emakumezkoetan, azken urteetan txapeldun izan den Berako Ainhoa Etxegarairekin batera, Leire Herrera (Antsoain), Sara Zapata (Txantrea) eta Nerea Huarte (Elkarte) ariko dira. Lehen bi sailkatuak Euskal Herriko txapelketan ariko dira.
Gizonezkoen txapelketan, berriz, zortzi kirolari arilo dira, tartean iaz podiumera igo ziren Manex Sarasola eta Luken Urtxegi. Beraiekin batera, Josu Elizalde (Betelu), Lur Gil (Elkarte), Iosu Huarte (Elkarte), Asier Agirre (Berriozar), Aimar Martinez (Berriozar) eta Aitor Blanco (Txantrea) ariko dira. Hemen ere, bi lehenbizikoek Euskal Herriko txapelketan hartuko dute parte.