Ttiki-ttikitatik trialeko bizikletarekin goi mailako konpetizioan ari da Uxuri Portu Crespo lesakarra. Nafarroako eta Espainiako txapeldun hainbatetan izana, bederatzi urte zituenetik munduko txapelketan parte hartzen ari da. Ez parte hartzen bakarrik, azken lau urteetan, Espainiako selekzioarekin, taldeka, munduko txapeldun izana zen. Bakarka, aldiz, munduko txapelketan bigarren, hirugarren eta laugarren izana zen. Orain, 13 urte bete berritan, bakarka ere munduko txapeldun izatea lortu du Lausannan (Suitza) hjokatu den 2026 Trials World Youth Games Txapelketan, 13 urtez beheitiko nesken kategorian.
Taldeka txapeldunorde
Ortziralean hasi zen gazte mailako Munduko Trial Txapelketa Lausannan (Suitza). Azken lau urteetan Espainiako selekzioa munduko txapeldun izan zen, baina aurtengoan bigarren postuarekin konformatu behar izan zuen, Frantziaren gibeletik. Alemania hirugarren izan zen.
Bakarka munduko txapeldun lehen aldiz
Larunbatean, berriz, bakarkako lanean hasi zen Uxuri Portu Crespo lesakarra, Girls U13 kategorian, 13 urtez beheitiko neskak, alegia. Finalerdietan ez zuen akatsik egin lesakarrak, baina denboraren arabera, bigarren izan zen, Abril Sanllehi kataluniarraren gibeletik. Denera 12 biker sailkatu ziren igandeko finalerako.
Igandean, finaleko oztopoen zailtasuna handitu zen, baina halere Uxuri Portuk berriro ere akatsik gabe egin zuen ibilbidea. Itzuli perfektua egitea lortu zuen eta bere aurkariek, aldiz, akatsen bat egin zuten. Ondorioz, lehen aldiz, bakarka munduko txapeldun da Uxuri Portu Crespo lesakarra. Bigarren izan zen Abril Sanllehi kataluniarra eta hirugarren Natalia Plonka poloniarra.
