Aitzineko bi urteen bezala, Arantzan eginen dute Euskal Herriko Eskolartekoa. Aurtengoa XXXVIII. edizioa izanen da eta larunbat honetan, ekainaren 13an eginen dute.
Herrialdez herrialde final guztiak jokatuta, hauek izanen dira larunbatean Arantzan kantatuko duten hamahiru bertsolariak: Arabatik Maia Ortiz de Zarate Idiakez eta June Astegieta Unzaga; Baxenabarretik Nahia Etxeberri Lopepe eta Gana Berhokoirigoin Zubeldia; Bizkaitik Iradi Barrenetxea Akesolo eta Jon Abasolo Sarralde; Gipuzkoatik Adei Urbitarte Aiestaran eta Kattalin Arabolaza Palomo; Lapurditik Unax Aizpurua Ibargarai saratarra eta Johane Larre Salaberri; Nafarroatik Kattin Madariaga Apaolaza aranztarra eta Kattalin Lizarraga Mendia leitzarra; eta Zuberoatik Leina Alkhat Larrandaburu.
Aurkezle lanetan bertze bi eskualdeko ariko dira: Ekhiñe Zapiain Arlegi beratarra eta Eki Mateorena Zozaia leitzarra.
11:30ean hasiko da finala. Bertsolariek ariketaz ariketako lanak egin ondotik, sari banaketa ekitaldia eginen dute, eta sariak ere zozketatuko dituzte. Bukatzean, mokadua eskainiko dute hurbildutako guzientzat. Saiorako sarrera librea eta debaldekoa izanen da.
Sintonia berria
Aurtengo edizioak badu bertze berrikuntza bat: sintonia. Neguan paratu zuten martxan Eskolarteko sintonia lehiaketa, eta Ekain Alegrerena izan da aukeratutakoa.