Ekainaren 13an, larunbatean 18:00etan Eztegara pilotalekuan hasiko den jaialdian Aspeko pilotariak ariko dira, Gure Txokoak eta Bortzirietako Pilota Eskolak antolatua
Jaialdia ekainaren 13an, larunbatean 18:00etan hasiko da Eztegara pilotalekuan. Lehenbiziko partidan, lau eta erdiaren barrenean ariko dira Alberdi II.a eta Rekalde, aurrez aurre. Binakako partidan, Murua eta Joseba Aldabe igantziarra, Beñat Apezetxea II.a goizuetarraren eta Gaskueren kontra ariko dira.
Erremontea ere
Larunbat arratsaldekoa ez da Altzateko bestetan eta Eztegara pilotalekuan jokatuko den pilota jaialdi bakarra. Izan ere, larunbat eguerdian, Nafarroako erremonte txapelketako lehen faseko azken partida erabakigarria jokatuko dute Zeberio II.ak eta David Mitxeo doneztebarrak, Matxin III.aren eta Otanoren kontra.