XXXIII. Gasna eta Artisau Feria igandean
Igandean goizetik izanen da mugimendua herrian, Gasna eta Artisau Feriaren hogeita hamahirugarren edizioa ospatuko baita. 10:00etan azokaren irekiera eginen dute trikitilariekin. Artisau azoka 10:00etatik 14:00etara egonen da eta, bitarte horretan, talo postua jarriko du Altxatak. 11:00ak arte gasna lehiaketako gasnak aurkezteko aukera izanen da. Lehiaketa honetara ardi latxaren esne gordinarekin egindako gasnak aurkezten ahal dira, gutienez 60 egunez onduak. Baztan, Malerreka, Bertizarana, Bortziriak, Xareta edo Leitzaldean bizi diren gasnagileek aurkez daitezke, bakoitza gasna bakarrarekin, eta 20 euro ordainduko zaie. 13:30ean izanen da sari banaketa. Bitarte horretan Nafarroa kanta taldeak azoka girotuko du eta ardi mozte erakustaldia eta zirian erretako ardiki pintxoak dastatzeko aukera ere izanen da. Goiz osoan Iriondoan baserriko lan tresnen erakusketa eta eskola zaharretan eskulan ikastaroko lanak ikusgai egonen dira.