Mugaz Gain Antzerki Jardunaldiak eginen dituzte Beran asteazkenetik ortziralera

Ttipi-Ttapa 2026ko ekainaren 1a
Deskargatu Info Ahotsak :
Español English Français Català Galego

Mugaz Gain Antzerki Jardunaldien barrenean hainbat antzezlan taularatuko dituzte aste honetan Berako Kultur Etxean.

Mugaz Gain Antzerki Jardunaldiak eginen dituzte ekainaren 3tik 5era, Ixtaklok elkarteak, Berako Udalaren eta Berako Kultur Batzordearen laguntzaz antolatuta. Herriko lau ikastetxetako ikasleek hartuko dute parte eta goizeko saioak ikasleentzat izanen dira eta arratsaldekoak publiko denarentzat. Goizeko sarrerek euro bat  balio dute eta arratsaldekoek, aldiz, bi euro.

Ekainaren 3an, asteazkena, hasiko da jaialdia ikasleentzako funtzioekin. Toki Ona Institutuko DBH 2ko ikasleek Teloneroak antzeztuko dute eta Labiaga ikastolako DBH2koek Nire antiojoak? 10:00etan. 12:00etan, Pasaiako Badia antzerki eskolako Pantalan taldeak Romeo eta Julieta taularatuko du eta eskola bereko Eskulunbruski taldeak Paperezko etxe errusiarra. 18:00etan Nire antiojoak? taularatuko dute Labiagako ikasleek, ate irekiekin.

Ekainaren 4an, ortzegunean,  goizean eta arratsaldean izanen dira saioak. 10:00etan Jesusen Bihotza ikastetxeko LH 5. eta 6. mailako ikasleek Hau… kasting-a da? antzeztuko dute eta 12:00etan Ricardo Baroja eskolako LH 4ko ikasleek Itsasoko abenturak jokatuko dute. 18:00etan bi antzerkiak eginen dituzte berriz ere, ate irekiekin.

Ekainaren 5ean, ortziralean borobilduko dituzte jardunaldiak. 10:00etan Labiaga ikastolako LH 5. mailako ikasleek Direnik ez direla ez erran obra taularatuko dute, eta 18:00etan lan hori bera jokatuko dute berriz, ate irekiekin. 

Kultura Bortziriak Bera

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun