Bidasoko Itzuliko bigarren etapako helmuga Lizarietan
Arratsaldean, berriz, Bidasoko Itzuliko bigarren etapa eginen da. Arantzatik abiatuko da 12:00 inguruan eta 16:00 aldean iritsiko dira txirrindulariak Lizarietara. 2002az geroztik ez zen Etxalarren Bidasoko Itzuliari bukaerarik eman eta aurten, gainera, herritar bat, Arri Atondo Elgorriaga, ibiliko da etapa irabazteko lehian. 1 zenbakia duen dortsala eramanen duen Atondorekin batera, Sunbillako lau txirrindulari (Aitor Igoa Arretxea, 21. dortsalarekin; Oihan Apeztegia Martinez (162. dortsalarekin; Unax Larraburu Hernandorena, 163. dortsalarekin eta Eneit Bertiz Apezetxea, 201. dortsalarekin) eta Donamariako bat (Mikel Lizasoain Etxebertz, 152. dortsalarekin) aterako dira Bidasoko Itzulian.
Ekitaldi hauek direla eta, herri inguruan bideak libre uztea (kotxerik ez aparkatzea), Lizarieta inguruan izanen diren bide mozketak kontuan hartzea eta antolatzaileak errespetatzea eskatuko da, denon segurtasuna eta ongizatea bermatzeko.