Ikasgelak kalera, Ikastolak herrira
Gaur kalera irten gara Nafarroako ikastolak. Kalera irten gara eta gure ikasgelak kalera atera ditugu gure seme-alaben etorkizunean eta Nafarroako hezkuntzan atzerapausorik onartzen ez dugula esateko. Ikastolak herritik sortuak eta herriarentzat lanean ari garelako sortu ginen lehen egunetik, egun bakoitzean eta egun guztietan, eta horretan jarraitzen dugula adierazteko irten gara kalera. Gure sare osoa, Ikastola bat duen herri bakoitza, kalean dago gaur. Sakanatik Baztanera, Beratik eta Bortzirietatik Hegoaldera eta Erriberara, Zangozatik Iruñerrira, Lizarratik Tafallara.
Gure sareari ez ezik, Nafarroa euskaraz josteari eta hezkuntzari murrizketak aplikatu nahi dizkiote. Eta gu haserre gaude. Haserre egoteko motiboak ditugu. Lehena, gure seme-alabentzat etorkizun onena nahi dugula da, eta, horregatik, Nafarroako haurrek ikastolan ikasteko eskubidea dutela aldarrikatzen dugu. Bigarrena, Nafarroa osoko hezkuntzak kezkatzen gaituela: aurrera egin beharrean, murrizketa hauekin atzera goazelako. Hirugarrena euskara da. Hezkuntza Departamentuak kontrakoa dioen arren, euskarari gelak murriztuko dizkiote. Hori oso larria da Nafarroan, hori oso larria da Nafarroa euskaraz josten duen Ikastolen sarearentzat. Laugarrena, erabakia arbitrarioki, elkarrizketarik gabe eta irizpideak bat-batean aldatuz hartu izana da. Horren froga da Hezkuntza Departamentua bere erabaki batzuk zuzentzen joan dela. Ikastolak beti gaude hitz egiteko prest. Baina elkarrizketa ukatzen badigute guri eta hezkuntza eragile guztiei, joko arauak partiduaren erdian aldatzen badituzte, ez gaude gauzak egiteko modu horrekin ados. Ez dugu onartzen begirune falta hori. Azkenik, auzolanean eraikitako komunitate oso bati bizkar emateak kezkatzen gaitu. Herrigintza lan oso bat da zigortzen dena. Berdintasuna eskatzen dugu, gure sarearentzat eta sare guztientzat. Hori da bidezkoa, hori da beharrezkoa, hori da aldarrikatzen duguna.
Beste behin, eta behar den guztietan, Hezkuntza Departamentuari bere erabaki arbitrarioa atzera bota dezala eskatzen diogu. Nafarroaren onerako, hezkuntzaren onerako, guztien onerako.