227.020 euroko aurrekontua izanen du aurten Lesakako Beti Gazte elkarteak

Ttipi-Ttapa 2026ko martxoaren 11

Lesakako Beti Gazte elkartearen urteko batzarrean 48 bazkide izan ziren. Denera 1.596 bazkide ditu, inoizko kopururik handiena.

Lesakako Beti Gazte elkarteak urteko batzarra egin zuen martxoaren 6an. Urte honetarako 227.020 euroko aurrekontua aho batez onartu zuten batzarrera hurbildu ziren 48 bazkideek, iazkoa baino 18.400 euro handiagoa den aurrekontua. Ohiko ekintzekin segituko dute aurten ere. Kirol fitxei dagokienez, futbolean 215, mendian 286, txirrindularitzan 62 eta sokatiran 28 ditu Beti Gaztek eta, kultur arloan, lerro dantzan 47 lagun biltzen dira, irakurle taldean 29, Beti Gazte kantarin 30, mutxiko taldean 17 eta joskintzan 42.

1.596 bazkide ditu gaur egun, inoizko kopururik handiena, kirol arloan 591 fitxa ditu eta kultur ekintzetan 165 lagun mugiarazten ditu

2025ko abenduaren 31n 1.596 bazkide zituen Beti Gaztek, inoizko kopururik handiena (urtebete lehenago baino bortz gehiago).

Bazkideek ordaindu beharreko kuotetan ez da aldaketarik izanen, ezta zuzendaritza batzordean ere. Ander Abuinek segitzen du lehendakari lanean; Nora Eneterreaga lehendakariordea eta instalazio eta material arduraduna; Xabier Iribarren eta Alberto Muruzabal idazkaritzan; Idoia Sunsundegi diruzaintzan; Argiñe Ordoki kirol koordinazioan; Alaia Alzugarai kultur koordinazioan eta Paola Oskoz da komunikazio arduraduna.

Batzarrean eskerrak eman zitzaizkien boluntario lanetan aritzen direnei (urtean zehar, egunero, futbolean eta kultur taldeetan, eta ekitaldi guztietan ere hainbat lanetan aritzen direnei) eta, aldi berean, boluntarioak faltan direla eta jendea animatzeko deia egin zuten.

Gizartea Bortziriak Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun