Bi protokolo (baserrietakoa eta herrikoa) prestatu ditu Etxalarko Sute Elkarteak, orain arte gertatu diren antolamendu faltak ez errepikatzeko. Elkarri ahalik eta gehien laguntzea da helburua. Sua ikusten duenak, auzo ordezkaria abisatu behar du lehenbailehen. Honek etxe jabea deituko du eta hartzen ez badu, 112ra emanen da abisua. Aurten herriko hidranteak eta mangerak errebisatu dituzte albintearen laguntzarekin eta auzo gehienetan bi ordezkari gehiago sartu dira.
Gogorarazi dutenez, mendiko suak itzaltzeko palak Zamudioneko bordan (Urritzokieta), Iturraldeko bordan (Larrapil-Sarriku), Arrineko bordan (Lakain-Apezborro), Tolareko bordan (Orizki), Goienetxegaraian (Lurriztiederra), Maisterreneko bordan (Gorosurreta), eta herrian Matisenean daude.
Aurten, elkarteak 150 urte bete dituenez, ekitaldiren bat antolatzeko asmoa ere badute. Joan den urtean Oronozko suhiltzaileen parkera bisitan joan ziren juntako kideak.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.