Otsailak 6, ortziralea
09:00 aldera bilduta, egun osoan gazteak etxez etxe eskean ibiliko dira, musikarien laguntzarekin. 17:00etan guraso elkarteak antolatuta, Mugi Dubi Doo ikuskizuna izanen dute (dantzak, musika, jokoak, malabareak...). Ondotik merienda banatuko du guraso elkarteak. Arratsean eskean aritu direnek afaria eginen dute Biltoki elkartean.
Otsailak 7, larunbata
08:00 aldean hasita, gazteak etxez etxe eskean ibiliko dira, musikarien laguntzarekin. Eguerdian, alde batetik, guraso elkarteak antolatutako bazkaria izanen da eskolako jantokian (helduen menua 38 eurotan eta haurrena 15 eurotan). Eta bertzetik, Baratzondo elkartekoak ere bazkaltzeko bilduko dira. Horrez gain, bazkalondoan, musika izanen dute. 18:00etatik 21:00etara musika izanen da guraso elkartearen eskutik. Ilunabarrean gazteek zozketa eginen dute eta hiru sari banatuko dituzte.
Otsailak 12, ortzeguna
Goizean, mozorroak soinean dituztela, eskolako neska-mutikoak etxez etxe eskean ibiliko dira: Haur Hezkuntzakoak herrian barna, 1. ziklokoak Piedade eta Frain auzoetan, 2. ziklokoak Sarrola eta Berrizaun auzoetan eta 3. ziklokoak Irrisarri auzoan eta bidean diren etxeetan. Arratsaldean guraso elkarteak merienda prestatuko du.