Euskal Herriko bi txapel Lesakan janzteko aukera ederra du larunbatean Beti Gazte sokatira taldeak

Ttipi-Ttapa 2026ko urtarrilaren 23a

Beti Gazteko 540 kiloko kategoriako emakumeak tiran joan den larunbatean Gasteizko Abetxukon. Ezpeletan bezala, tiraldi guziak irabazi zituzten eta Lesakan txapela janzteko aukera bikaina dute.

Euskal Herriko goma gaineko sokatira txapelketako bi txapel jokoan izanen dira urtarrilaren 24an, larunbatean 17:00etan hasita, Lesakako udal pilotalekuan. Emakumeen 540 kiloko kategorian, Beti Gaztek kasik eskuekin uki dezake txapela, Ezpeletan eta Gasteizen jokatutako bi jardunaldietan tiraldi guziak irabazi ondotik eta horietan lortutako puntuak kontuan hartzen direlako. Gizonezkoen 640 kiloko kategorian, Beti Gazte bigarren izan zen Gasteizko jardunaldian, Ezpeletako Ñapurrak taldearen ondotik, baina Lesakan hutsetik hasiko dira lehian.

Emakumeen 540 kiloko eta gizonezkoen 640 kiloko finalak jokatuko dituzte udal pilotalekuan, larunbatean 17:00etan hasita

Emakumeen 560 kiloko kategorian, beraz, Beti Gaztek hamar puntu ditu eta Txantrea eta Ibarra berdinduta daude bigarren postuan, zazpina punturekin. Gauzak honela, larunbatean Lesakan hirugarren izatea ere aski luke Beti Gaztek txapela janzteko. Hiru talde hauekin batera, Badaiotz eta Abadiño ere lehiatuko dira.

Gizonezkoen 640 kiloko finalean lehia estuagoa espero da, Ezpeletako Ñapurrak taldeak zortzikote indartsua baitu eta Gasteizen nagusitu zitzaiolako Beti Gazteri. Baina, kasu honetan, puntuazioa zerotik hasiko da larunbatean Lesakan. Txapela janzteko bi faborito nagusiekin batera, Ibarra, Zuraide, Abadiño eta Txantrea ere ariko dira tiran.

Kirola Bortziriak Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun